المهم قبة
مقالات

المهم قبة

إحنا شعب بدنا إنتخابات
بدنا انتخابات بالقدس
وبدنا انتخابات بدون القدس
إحنا شعب بدنا قبة الصخرة بس ممكن نكتفي بقبة التشريعي
بدناش أوسلو بس بدنا تصريح نروح على عكا
بدناش تنسيق بس بدنا نبعت رسالة على صفحة المنسق
إحنا شعب بنكره المسؤولين بس لما نشوفهم بنعزمهم على خرفان محشية
إحنا بدنا نوخد قرض من البنك نشتري لاند روفر وما معنا نعبيه بنزين
وبنفرح لما نستلم المبلغ وبندعي عليهم لما ينخصم اول قسط
وبنسب على سلام فياض عشان اخدنا القرض !! ( مش عارف ليش ) !!
إحنا شعب من حقنا نتاجر بس بدناش ندفع ضريبة
بدنا نقاطع منتج الأعداء بإسنثناء الأشياء الزاكية
بدنا شارع حلو وبدنا نرمي فيه علبة الكولا
بدنا رصيف مرتب وبدناش نمشي عليه
بدنا حاوية وبدنا نترك الزبالة جنبها
وبنرمي زبالتنا من شباك السيارة ولما نروح على نتانيا بنحكي ( يا الله شو نضيفة البلد )
بدنا طب على أصوله وبدنا نكسر الطورائ لما نزعل
إحنا شعب بدنا لقاح كورونا زي العالم
وإحنا شعب بنعرف أي لقاح أحسن واذا ما لقينا اللقاح الي بدنا اياه بنحرد وما بنتطعم
إحنا ما بدنا إغلاق لا جمعة ولا سبت وبدنا نعمل أعراس وممنوع نمرض
إحنا شعب بدنا الحكومة تعمل إجراءات صارمة وما بدنا نلتزم فيها
إحنا شعب بعتبر كورونا مؤامرة واذا حدا من عيلتنا صابته العدوى بنسب على الحكومة عشان مش لاقي لقريبه مكان مريح بالمستشفى
إحنا شعب بدنا نطخ بالعرس وبدناش ننزعج ولا بدنا حدا ينصاب برصاصة طايشة
إحنا شعب بدنا ديمقراطية وبدناش حدا يناقشنا
بنحترم الرأي الآخر بس ما بدنا نسمعه
بدنا أمن بس بدناش نحترم النظام
إحنا بدنا أشياء وأشياء ما أنزل الله بها من سلطان 
 أهم إشي إنه الي بيسري على غيري ما يسري علي
ولانه على راس كل واحد فينا ريشة بنحب مبدأ ( يحق لي ما لا يحق لغيري )

هذا المقال يعبر عن وجهة نظر صاحبه، ولا يعبر بالضرورة عن وجهة نظر وكالة صدى نيوز.